Diskou Danielle Vicky Castel loyera premye edisyon konkou literè Bèlbranch ak Ilyeniz Jean-Baptiste

Nan dat 15 novanm 2024, nan lokal Sant Lakay –Papay, komite konkou literè a sou direksyon komite kòdinasyon pwogram jèn nan MPP, rive reyalize premye edisyon konkou literè Bèlbranch ak Ilyeniz Jean-Baptiste. Aprè evalyasyon manm jiri yo Danielle Vicky Castel sòti loreya nan yon nòt 53.75/70. Li nan nivo NS2, idantifye nan nimewo 003, elèv nan « Collège St-Gabriel  – Lascahobas ».

Prezantasyon Danielle Vicky Castel.

Mwen rele Danielle Vicky Castel, mwen sòti Laskawobas, mwen genyen 15 ane epi mwen pasyone pou politik. Chemen akademik mwen te kòmanse nan NECLAS, kote mwen te etidye depi kindergarten rive nan 9yèm ane fondamantal. Ane sa yo te fè m vin genyen plis konesans epi devlope lanmou mwen pou mwen aprann. Depi lè sa a, mwen kontinye etid segondè mwen nan CSGL, kote mwen pase de (2) dènye ane mwen yo (NS1 ak NS2), sa ki ranfòse angajman mwen pou ekselans akademik ak patisipasyon aktif. Kòm yon elèv ki sèvi kòm modèl, mwen patisipe nan plizyè konkou ak deba, nan yon dezi pou mwen konprann lemonn epi chanje li pou li pi bon. Mwen reve pou m enspire jenerasyon mwen an pou yo kwè nan yon avni kote jistis pran plas li, epi pou yo vin lidè demen. Lanmou mwen pou jistis ak dezi mwen pou mwen wè yon lemonn ki pi jis te pouse m sòti nan zòn konfò mwen, pou m aprann, koute, epi eksprime mwen. Mwen reve pou m pote vwa moun ki pa genyen yo. Mwen vle reprezante yon jenerasyon lidè ki genyen kouraj pou yo chanje sosyete a, nan ampati ak detèminasyon.

Diskou Danielle Vicky Castel.

Mesye fondatè MPP Chavannes Jean Baptiste, Direktè depatmantal edikasyon sant lan, Madam kòdonatris Nadège Saintil,

Diferan kòdinasyon jenès MPP, etidyan yo, gayan yo, ak tout envite yo,

Jodi a se yon gwo privilèj pou mwen pran lapawòl nan non tout senk  gayan konkou literè a ki pote non Bèlbranch ak Ilyeniz Jean-Baptiste. Premye mo remèsiman mwen ale dwat bay Bondye ki toujou kanpe bò kote mwen, e ki mete limyè sou chimen mwen.

Yon gwo mèsi pou Madam Altagrace Jean-Baptiste ki te panse mete yon konkou konsa. “Mèsi  tout fanmi  : Jean-Baptiste …“

Mwen vle di Clara Castel yon gwo mèsi, ki te pèmèt mwen jwenn enfòmasyon sou konkou sa a.  Gras  li menm, mwen te kapab patisipe epi rive jodi a kote mwen kanpe la kòm youn nan gayan yo. Mwen vle remèsye tou Mèt Fritz, ansyen pwofesè mwen, ki genyen anpil devouman, nan ede m nan koreksyon tèks la, ofri m konsèy k ap bay rezilta.

Mwen pa ka bliye fanmi mwen, ki se pi gwo sous fòs mwen. Manman m, papa m, ak sè mwen, mèsi pou lanmou ak sipò san kondisyon. Se gras nou  menm, mwen rive jodi a, kanpe nan fyète ak kè plen rekonesans.

Mèsi pou tout moun ki te akeyi mwen nan kè kontan depi premye jou mwen te rive isit la. Sipò ak chalè sa yo fè m santi m lakay mwen epi bay plis valè nan vwayaj mwen nan konkou sa a.

Mwen vle remèsye manm jiri yo pou travay yo ak objektivite yo, e finalman, yon gwo mèsi pou etidyan Lekòl Fòmasyon Politik Chalmay Peralt yo, ki te bay mwen yon espas pou mwen aprann, grandi, epi jwenn enspirasyon.

Apre konkou sa a, mwen santi yon gwo satisfaksyon ak rekonesans. Se yon eksperyans ki te pi plis pase yon senp konkou : li te yon vwayaj ki anrichi m sou plan entelektyèl ak emosyonèl. Mwen aprann, lè nou ini fòs, pasyon ak detèminasyon, tout bagay posib.

Mèsi anpil tout moun pou sipò nou ak lanmou nou. Se ansanm nou kapab fè tout  sa ki bon. Menm fòs sa a, bay mwen anpil enèji pou mwen batay nan chanjman jenerasyon mwen an.

Kòlèg gayan yo, nou pa p kanpe, n ap kontinye batay pou nou rive kote nou vle rive a.