Madi 29 jiyè 2025 : ouvèti ofisyèl 27yèm edisyon Kan Nasyonal Souverènte Alimantè nan Mouvman Peyizan Papay (MPP)
Jèn yo debou pou n bati lapè ! Se nan eslogan sa a 27 edisyon kan nasyonal souverènte alimantè a reyalize nan sant lakay Papay soti 28 jiyè rive 3 dawout 2025. Objektif kan an se ede jèn yo konprann okenn peyi sou planèt tè a pa p kapab devlope san li pa granmoun nan zafè manje pou li jere pitit li yo. Anviwon 250 jèn fanm ak jèn gason vini patisipe pandan y ap reflechi sou tèm : jèn yo, an n angaje n nan konstriksyon yon pwojè lavi. Lendi 28 jiyè 2025, nan aprè midi, komite kòdinasyon kan an sou lidèship kòdonatris pwogram jèn MPP – Nadège Saintil, resevwa jèn yo nan yon anbyans lakontantman nan lokal Sant lakay Papay. Nan aprè midi sa a, chak manm kòdinasyon kan an fè yon kout prezantasyon devan jèn yo. Prezante yo kòdonatè ak kòdonatris chak sou komite kan an. Pale jèn yo sou ansanm prensip yo dwe respekte pandan moman y ap pase a. Preparasyon mistik ouvèti a sou direksyon Edmond Mathieu ak Emmanuella D. Germain.
MPP LANSE GRAN OUVÈTI 27YÈM EDISYON KAN NASYONAL JÈN SOU SOUVERÈNTE ALIMANTÈ JOUNEN MADI 29 JIYÈ 2025 LAN NAN NAN SANT LAKAY
Kan nasyonal jèn sou souverènte alimantè a se yon tradisyon andedan MPP ki pran nesans depi ane 1998.
Patisipasyon Mouvman Peyizan Papay (MPP) nan asanble 4 je kontre
Yon dizèn reprezantan òganizasyon sòti nan plizyè depatman an Ayiti, rasanble nan Lakay Sant Nasyonal Fòmasyon Kad Peyizan/Sant lakay nan Papay, nan dat 10 rive 13 fevriye 2025. Objektif asanble a se boukante lide avèk tout òganizasyon peyizan yo ki enterese entegre platfòm 4 je kontre a. Men se òganizasyon k ap pote revandikasyon peyizan yo nan tout nivo, tankou nan nivo politik, ekonomik, sosyal ak kiltirèl. Platfòm 4 je kontre swete ranfòse tèt li nan konstri yon pi gwo fòs sosyopolitik k ap pote revandikasyon peyizan yo nan nivo nasyonal ak entènasyonal. Se yon evènman ki te konpoze plizyè pwen diskisyon, tankou : analiz konjonkti ; prezantasyon 4 je kontre ; reprezantan òganizasyon yo te bay yon istorisite sou òganizasyon yo ; yon deba sou referandòm ak eleksyon an Ayiti, nòt pou laprès sou pozisyon politik 4 je kontre sou konjonkti sosyopolitik la, elatriye.
Mouvman Peyizan Papay (MPP) nan selebrasyon 5 jen : jounen entènasyonal anviwònman an
Jounen entènasyonal anviwònman 5 jen an selebre nan lokal Sant lakay Papay, anba tèm : patisipasyon jèn yo nan konbat dechè plastik pou pwoteksyon anviwònman. Nan pwogramasyon evènman sosyokiltirèl sa a, te genyen, tankou : animasyon (Diodat Elie, Nadège Saintil), mo direksyon egzekitif MPP sou direksyon Mulaire Michel, chante Im nasyonal ayisyen an ak mistik revolisyonè – se yon mistik ki montre kòman popilasyon an ap jete fatra (pwodui estiwofòm, daypè…) toutpatou ki kontribye nan degrade anviwònman an. Pami sitwayen yo ki konsyan deside angaje yo nan lit kont degradasyon anviwònman an pandan yo itilize lòt modèl eleman nan konsomasyon yo, nan espas sosyal la, tankou plante pye bwa. Yo itilize tit chante MPP ki di : “gade tè a, pile tè a, peze tè a, donte tè a separe tè a” p.63. Pèfòmans kiltirèl (gwoup Ibolele MPP, eslam), konferans sou anviwònman (Iselande Alexandre ak Gumpson Cherenfant), konferans sou dechè plastik (Gerline Jeannot ak Chavannes Jean Baptiste) ak pwopozisyon jèn yo nan kad pwoteksyon anviwònman an. Jwèt kesyon repons pou prim sou konferans yo. Pami kesyon yo : bay 2 relasyon ki egziste antre eleman yo nan anviwònman an ? Ki ane plastik kòmanse pwodui masivman nan lemonn ? Ki syans ki etidye òganis vivan yo ? Kisa mikwoplastik la ye ? Bay 3 konsekans degradasyon anviwònman an ? Konbyen tan yon boutèy plastik pran pou li degrade ? Bay yon definisyon klè sou anviwònman an ? Konbyen tan estiwofòm yo pran pou yo degrade ? Bay pousantaj dechè plastik ki kapab resikle yo ? Bay 5 aksyon konkrè nan pwoteksyon anviwònman an ? Kisa polisyon plastik la ye ? Bay 2 orijin degradasyon anviwònman an ? Kòman nou kapab defini biyodivèsite a ? Bay twa koz degradasyon anviwònman an ? Nan sans sa a, an n li ansanm nan liy anba yo pwen fò refleksyon jounen an.
Vizit solidarite ALBA Movimientos nan Mouvman Peyizan Papay (MPP) an Ayiti
Jedi 3 jiyè 2025, MPP te kontan akeyi plizyè kamarad ALBA Movimientos ak lòt reprezantan òganizasyon Chapit – ALBA Ayiti, nan lokal Sant Nasyonal Fòmasyon Kad Peyizan/Sant Lakay. Objektif vizit sa a se : ranfòse aksyon solidarite yo an Ayiti, chèche konprann reyalite sosyopolitik Ayiti a pi byen epi gade ansanm kòman elabore yon plan aksyon ki chita sou priyorite solidarite Chapit – ALBA Ayiti ap mennen yo. Nan moman sa a, gwoup Ibolele MPP te sèvi legba nan louvri vizit sa a pandan li bay yon pèfòmans kiltirèl ki montre fason MPP apresye nan anpil chalè vizit sa a. Anplis gwoup akèy la envite delegasyon an monte drapo nan chante Im MPP, Im nasyonal peyi d Ayiti ak Im entènasyonal sosyalis la. Ofisyèlman rankont solidarite a louvri nan MPP. Nadège Saintil (kòdonatris pwogram jèn MPP), Diodat Elie (Sekretè jeneral MPP), yo te sèvi kòm animatè evènman an. Nan pwogramasyon jounen an : akèy, mo byenvini, pèfòmans kiltirèl, prezantasyon MPP, foto souvni an gwoup, echanj, vizit – Sant Lakay, Radyo Vwa Peyizan (RVP), gwòt Basen Zim ak manje ansanm.
Patisipasyon Mouvman peyizan Papay (MPP) nan jounen entènasyonal lit peyizan an
Mouvman Peyizan Papay (MPP) nan kolaborasyon Enstiti Nasyonal Refòm Agrè (INARA) ak Direksyon Depatmantal Agrikilti Sant (DDA-S) lan, yo te òganize yon gwo rasanbleman devan lokal INARA ki lokalize nan twazyèm seksyon kominal Ench, Agwayedyonn riv dwat. Nan prezans plis pase yon santèn Peyizan pandan jounen 17 avril 2025 lan. Se yon pratik andedan òganizasyon an nan komemore jounen sa a. Rasanbleman an te fèt anba tèm : “Fèm agrikòl yo pa pou vann ni pou fè kado”. Tèm La Via Campesina (LVC) chwazi nan okazyon sa a se : “Tè, Dlo, Teritwa pou Lavi”. Depi 10è nan maten anpil preparasyon te deja fèt nan reyalizayon aktivite sa a. Anpil Peyizan ak lòt moun nan kominote a te vin patisipe. Avan ouvèti ofisyèl evènman an, sou direksyon dirijan MPP, Edmond Mathieu, reyalizasyon yon mistik revolisyonè. Mistik sa a kòmanse nan chante MPP ki di : “Peyizan yo an nou met tèt ansanm oo, Peyizan yo an nou mete tèt ansanm, nèg lavil yo gade nou kòm gwo zago si nou pa travay, yo pa p manje”[…] Se yon mistik ki tradui kòman Apantè, bandi yo abitye fè dappiyanp sou tè Peyizan yo. Anplis, li montre kòman lè Peyizan yo òganize yo, y ap genyen fòs nan batay kont moun k ap vòlè tè yo.