Asanble Mouvman Jèn Ench (MJH) nan Mouvman Peyizan Papay (MPP)

Devan pòt la.

Plis pase 10 gwoupman te make prezans yo pandan jounen 19 oktòb 2024 la, se rankont asanble Mouvman Jèn Ench nan MPP ki reyini plis pase 60 jèn fanm ak jèn gason. Se yon asanble ki fèt nan Sant Nasyonal Fòmasyon Kad Peyizan yo/Sant Lakay. Objektif asanble a se redinamize jèn yo nan vil Ench. Nan moman asanble a plizyè animatè MPP nan vil Ench te pran lapawòl : Vanier Louis, Jonel Jean-Baptiste, Gueslin Mathe ak Questamène Cenor. Manm fondatè MPP an te pale sou pètinans asanble a. Kòdonatris pwogram jèn MPP an -Nadège Saintil te bay mo byenvini a ak pran lapawòl nan non kòdinasyon an. Li ankouraje jèn yo pou yo konprann konplo enperyalis yo nan modèl rapò politik miwo miba yo genyen ak peyi a. Li montre nesesite pou jèn yo aprann mennen travay kolektif. Kòdonatris pwogram jèn nan fè konnen kòdinasyon an disponib pou li travay nan kolaborasyon ak tout gwoupman jèn yo.  Kòdonatè Mouvman Jèn Ench MPP an, Charlot Joseph, li te pran lapawòl pou li te swete tout moun byenvini epi prezante manm komite MJH yo. Philfrant Saint-Naré, responsab politik nan pati politik Kontrapèp la, prezante yon analiz sou konjonkti politik la. Anfè, pou asanble a te demare, yon mistik revolisyonè te reyalize avan lansman ofisyèl asanble a, ki se yon moman konsantrasyon, refleksyon pou nou soulve konsyans lespri k ap dòmi yo.

Chavannes Jean-Baptiste sou pètinans asanble a.

Manm fondatè MPP an – Chavannes Jean-Baptiste pale sou pwogramasyon jounen an. Li fè konnen fòma nòmal yon asanble MJH ta dwe genyen an, se pa li k ap fèt nan moman an. Menm pwogram nan se pa menm komite MJH yo ki elabore li. Se manm ekip MPP an ki fè li. Nan MPP nou pa genyen pou nou envite MJH, men se MJH ki pou envite nou, se li ki pou fè direksyon MPP an mache. Objektif rankont lan, se relanse MJH.Nan sans sa, se yon asanble espesyal. Nan estrikti MPP an, chak zòn  dwe reyalize yon asanble chak trimès. Se yon aktivite ki dwe atire atansyon tout moun, konsa si yon moun pa prezan pou li santi li pèdi.

Kamarad Chavannes pwofite pale sou evolisyon mouvman jèn yo nan MPP.  Souvan nan MPP manm yo pa souvan konnen lè yo sòti nan mouvman jèn pou yo pase nan mouvman adil, se yon pwason kraze nan bouyon. Yon kamarad kapab toujou genyen 60 oswa 70 ane men l ap travay nan mouvman jèn nan. Depi plizyè ane nou deside mete kanpe : mouvman jèn pwofesyonèl, inivèsitè […] Se yon fason pou nou ranfòse mouvman jèn MPP an. Yo tout ap travay pou yo rive konstrui yon lòt Ayiti.

MPP pran nesans nan vil Ench, li genyen nan plan li pou li fè vil Ench yon vil modèl, men nou pako janm kapab rive atann objektif sa a. Mouvman jèn nan Ench dwe plis dinamik, nan moman genyen batay elektoral pou yo byen reprezante, menm rive genyen eleksyon an. Nan vil Ench genyen 2 estrikti MPP adil ak MPP jèn yo. Jodi a, estrikti sa yo manke dinamik. Anpil tantativ fèt pou nou redinamize MJH, men anyen pa rete pou lontan. Li enpòtan pou nou aranje sa a. Plizyè manm nan MJH pati kite peyi a nan pran kanntè, ale etidye, ale nan pwogram Biden, elatriye. Komite ki prezan dwe redinamize MJH si yo pa kapab pou yo remèt demisyon yo. Tout manm gwoupman yo dwe fè yon sèl pou MPP genyen yon lòt reprezantasyon sosyal nan vil Ench. Nou genyen potansyalite pou nou fè Plato Santral la bouje.

Mouvman jèn nan se yon priyorite absoli nan MPP. Mwen (Chavannes Jn-B) te kòmanse pou kont mwen. Mwen ale pran yon kou nan jesyon nan peyi Lafrans pou mwen vanse nan mouvman jèn nan. Mwen vin konprann tout anbisyon mwen genyen yo, mwen pa p kapab fè yo pou kont mwen. Sekonsa, mwen vin konprann fòk mwen fòme lòt jèn pou yo kapab itil nan bon jan jesyon peyi a. Lè mwen t ap aji se lide yon chanjman sosyal pou Ayiti, se pa t lide MPP dabò ki te nan tèt mwen. Mwen rive fòme anpil jèn, men mwen konstate genyen yon pwoblèm ankadreman pou gwoupman jèn pwofesyonèl yo, elatriye. Se youn nan rezon nou mete kanpe kòdinasyon pwogram jèn MPP an.  Premye batèm yo se reyalizasyon 26 zyèm edisyon kan nasyonal souverènte alimantè a. Mwen mete chapo devan gwo travay sa a yo rive akonpli. Se yon prèv ki montre mwen te byen travay.

Nan Ench MPP genyen yon ekip ki fè travay ediksyon popilè a. Si genyen pami moun ki nan ekip animasyon nan Vil Ench, n ap mande yo pase devan pou nou souple. Genyen 3 reprezantan nan ekip animasyon nan vil Ench, men genyen absans kèk lòt manm. Ekip sa a pa genyen gwo koneskyon ak komite MJH sila a. Ekip animasyon Ench lan, se premye pilye MJH, ki jounen jodi a kreye se nou rele MOPAH. Genyen moun nan ekip MJH la ki genyen pou yo rejwenn ekip animasyon an ki nan vil Ench. Yo dwe kreye yon dinamik travay ansanm. Yo tout dwe travay pou nou konstrui yon lòt MPP, yon lòt Ayiti.

Pami pawòl animatè ak animatris Ench yo.

Vanier Louis animatè nan MPP, salye inisyativ sa a. Genyen plis pase yon ane depi yon rankont te fèt pou nou te separe nou ak MJH. Chak ane dwe genyen yon transfè ki fèt pou kèk nan nou sòti nan MJH pou rive nan Mouvman Patriyotik Ench (MOPAE, an kreyòl, MOPAH an fransè)). Nou te jije nou pa ka ti granmoun pou nou te rete nan mouvman jèn nan. Nou prè pou nou travay ansanm, fè suivi nan gwoupman yo […] Gueslin Mathe se animatè nan vil Ench. Selon li menm, kamarad Vanier Louis gen tan di tout bagay. Li ajoute lontan lè yon moun se yon manm MJH te genyen yon gwo koneksyon antre yo. Youn te konnen lòt, te toujou genyen chita pale ansanm. Li kontan chita pale sa a pou nou kapab konekte. Jonel Jean-Baptiste, animatè nan MPP, salye tout moun, li sòti nan PPJTP (Pre-Pepinyè Jèn Travayè Peyizan), Mouvman Jèn Ench (MJE, an kreyòl, MJH an fransè) rive nan MOPAH. Li felisite tout ekip la ki pran inisyativ sa a. Li reprann pawòl ki di : lajenès se avni peyi a. Lajenès dwe kontinye batay pou li leve eskanp figi peyi a. Lajenès dwe kontinye mennen lit la, fòk Ench rive nan ebilizyon men se manm MJH yo ki dwe fè sa a. Kamarad Jonel Jean-Baptiste mande pou chak moun pran responsabilite yo. Kamarad Jonel reprann pawòl kamarad Chavannes kote li te di : « nou genyen jèn ki genyen kapasite, men se volonte ki pa genyen ». Nou dwe envite tout lòt jèn nan Ench, pou yo vini entegre MJH, pou nou redinamize vil Ench. Pou Questamène Cenor, animatris nan MPP, li konstate lòt kamarad yo deja sanse di tout eleman enpòtan yo. Li panse nou dwe ini ansanm pou nou genyen kontwòl vil Ench politikman.

Refleksyon Chavannes Jean-Baptiste sou Sant Kiltirèl – CJB.

SK-CJB, se pa yon inisyativ Chavannes Jean-Baptiste ni MPP. Se yon inisyativ Valéry Joseph. Mwen rankontre kamarad Valéry Joseph nan TÒS, li te reprezante Petwotchalendjè. Konsa li te vin enterese pou li pran fòmasyon nan Lekòl Fòmasyon Politik Charlemagne Péralte (LFPCP). Li te genyen yon bèl pèfòmans nan Lekòl la. Pi devan li vin prezante mwen lide pwojè SK-CJB ansanm ak kamarad Samuel Bellot. Yo fè m konnen se non mwen sant lan ap pote. Yo bay mwen yon ansanm agimantasyon sou ang sa a. Lè mwen fin analize agiman yo, mwen pa t genyen vrèman agiman kontrè kont refleksyon yo. Mwen konstate genyen plizyè lòt kamarad k ap kolabore pou yo fè sant lan vanse. Pami yo : Emmanuela Germain, Islande Alexandre ak Netia Bethsaïna Pierre. Mwen pale nan non kamarad Valéry, pou mwen envite nou pote kole nan sant lan.

Philfrant St-Naré nan analize kèk pwen sou konjonkti politik la.

Analiz konjonkti politik la fèt nan nivo nasyonal ak entènasyonal. Pami gwo pwen yo nan nivo nasyonal : depòtasyon ayisyen nan Repiblik Dominikèn, ensekirite, analize konpòtman komisè Jean Ernest Muscadin, Akò 3 avril 2024, dappiyanp sou tè, lide revokasyon minis zafè etranjè an, prezidan tounan nan Konsèy Prezidansyèl Tranzisyon an (KPT), konfli politik antre Minis Garry Conille ak KPT an, lide revolisyon Guy Philippe ap pwone a, elatriye. Pami gwo pwen yo nan nivo entènasyonal : depòtasyon 3000 dominiken nan peyi Meksik, eleksyon nan peyi Etazini, si Donald Trump rive prezidan ki konsekans sa kapab genyen sou Ayiti, elatriye.

Fonksyònman MJH

Yon radyografi fèt sou fonksyònman gwoupman yo nan vil Ench. Genyen nesesite pou redinamize gwoupman yo nan vil Ench. Gwoupman yo bezwen bon jan ankadreman. Se youn nan fason pou nou redui kantite gwoupman k ap kraze yo. Li enpòtan pou nou ranfòse ekip animasyon an sitou entegre jèn yo ki pase nan LFPCP. Demi Brigad Ench lan genyen tou yon responsabilite nane nvite tout manm MPP ki pase nan LFPCP nan yon rankont pou yo bati yon veritab koneksyon. Youn nan misyon manm MPP ki pase nan LFPCP la se fè edikasyon popilè a. Yo kapab akonpanye gwoupman jèn MPP yo.

Jodi a, n ap bati yon MPP ki chita plis sou kalite olye kantite. Nou bezwen jèn ki disipline, k ap milite epi ki kwè nan fòmasyon politik ak ideyolojik. Genyen espas aprantisaj nou kreye k ap pèmèt jèn yo konnen MPP, sitou nan kreyasyon Jeni 50 tyèm MPP an. Se yon Jeni ki sou twazyèm edisyon li. Nou ankouraje jèn yo nan yon demach aprantisaj kolektif.

Pèspektiv MJH.

• Chak gwoupman dwe konfime patisipasyon yo nan rankont MJH pou mwa novanm 2024 la ;
• Rekonekte ak redinamize gwoupman yo ;
• Rekipere manm gwoupman yo ki genyen gwoupman yo ki kraze;
• Komite animasyon Ench lan ak komite MJH dwe chita ansanm pandan mwa desanm 2024 lan, nan lide pou MOPAH ak MJH travay nan yon fason kolektif;
• Kreye yon espas sosyalizasyon pou manm MJH yo kote y ap fè yon aktivite chak mwa.